0
0
Read Time4 Minute, 14 Second
सुण स्याणी ! आज आपणा कोम्प्लेक्स में ब्लोक बी में कोई फंक्शन है के? –सेठजी पूछ्या. सेठाणी बोली- नई तो…! आ बात कैयां पूछ्या? कोई कुछ बतायो के? सेठजी बोल्या – नई थोड़ी देर पैली एक केटरर बी ब्लोक में कोई को एड्रेस पूछ रियो हो. अब मैं बाजार स्यूं सब्जी-फल लेयर पाछो आयो जणा देख्यो क कॉफी बणाबा हाळी मशीन, क्रोकरी, मिनरल वाटर की बोतलां गाडी स्यूं उतर रही ही. ओर भी कई सामान आया है. सेठाणी दिमाग पर जोर देयर बोली- ओओओ..अरे बाबा फंक्शन कोनी..बी ब्लोक में जालानजी का पिताजी को शरीर शांत होग्यो हो ना…बाँकी बैठक शुरू हुई है आज स्यूं..आज दीतवार है भीड़ खूब होसी…थे भी बैठक में जा’र आज्यो. पण बैठक के वास्ते कैटरर क्यूँ आसी?? कालनै ओर कोई बात तो कोनी ना..?? एक बर थे सुराणा जी नै फोन करके कन्फर्म कर ल्यो.
सेठजी सुराणा जी ने फोन लगायो. सुराणा जी बोल्या –अरे हाँ हाँ! आज स्यूं बांके घर में आज स्यूं बैठक शुरू है. पण निहायत मक्खीचूस आदमी है. बाने बतायो जनगति कैटरर पण पीसा बचाण के लिए बुलायो है रुगलिया कैटरर ने. जनगति हालो इम्पोर्टेड क्रोकरी देतो, सर्विस में सुन्दर लेडीज अर जेंट्स देतो..पण छोड़ो आपां ने के पड़ी है. ठीक दो बजे आ जायो.
सेठजी सेठाणी ने बोल्या- सुराणा जी कन्फर्म कर दियो क शोक सभा आज स्यूं ई शुरू होसी. तू बी चालिए..कोम्प्लेक्स को काम है..
सेठ अर सेठाणी दोनूं बैठक में पूंचग्या. अभी आदमी ज्यादा कोनी हा. शोक सभा में कैटरिंग का आदमी ज्यादा घूमता नजर आ रिया हा. कोई मिनरल वाटर की बोतल लेके घुम रियो हो..कोई चाय..कोई कोफी…लोग दो-चार मिनट तो दिवंगत सुराणा जी के बारे में बातां करया पछै आपस में खुसुर-फुसुर चालू कर दिया.
सेठ-सेठाणी थोड़ी देर बैठकर पाछा घरां आग्या. सेठाणी बोली- देखो आपणा समाज की हालत. आपां तो सामान देखकर ताज्जुब कर रिया हा..पण लुगायां नै ऐ इंतजाम कम लाग रिया हा. एक लुगाई बोल री ही क शोकसभा कोई मिडिलक्लास का आदमी की जियां लाग री है…आजकल तो हल्काफुल्का स्नैक्स बी चाले है. कम स्यूं कम दो-तीन तरह का बिस्कुट अर नमकीन तो होणी चाए ही. बीकी बात सुणकर दूसरी लुगाई बोली कि अजी मैं तो काल ई एक बैठक में जा’र आई हूँ चांदी का गिलासाँ में पाणी दे रिया हा..अर जत्ता जणा गया बांने पचास-पचास रूपया का बामण-दक्षिणा का लिफाफा दिया है. सेठजी बोल्या –हाँ ! मने बी कोई खेमका जी बता रिया हा क आजकाल तो बैठक में गयोडा लोगां ने गीता, रामायण या कोई धार्मिक ग्रन्थ बी देणे को रिवाज है…आपका स्टेटस गैल बामण दक्षिणा को लिफाफों पचास स्यूं सौ रिपिया तक को होवै है. अर बीच में नमकीन काजू –बादाम भी घुमावे है. लोगां की भीड़ होवे है..इणकी बैठक तो कोई फैक्ट्री हाला की बैठक सी लागै ही कोनी..स्टेटस बिलकुल मेंटेन कोनी.
#शिखर चंद जैन
